Di dibistanan de armanc ne tenê fêrkirina zimane, di heman demê de zarok fêrî çand û baweriya Êzdayetiyê jî tên kirin û ji qirkirina çandî ya li ser civaka Êzidî jî tên parastin.

Îsal li Tilizêrê yekem car dibistana perwerdeya zimanê Kurdî (latînî) hatiye vekirin. Saziya Ziman û Perwerdeya Kurdî ya Êzidiyên Şengalê bi hatina biharê re şahiyek bo zarokên Tilizêrê lidarxist. Her wiha zarokên dibistanên Erebî jî ji bo şahiyê hatin vexwendin û tevlî şahiya dibistana Kurdî bûn.

Zarokên bi şahiyê şabûn, bi cilên xwe yên çandî yên Êzidiyan û cilên Kurdî beşdarbûn, stran gotin.

‘Tîpên latînî têne fêrkirin’

Mamoste Elî Mirad têkildarî perwerdeya bi zimanê Kurdî wiha axivî: “Di dema fermanê de zarokên Êzidî ji perwerdeyê dûr ketin. Ji ber şer, derûniya wan têkçûbû, ji her tiştî ditirsiyan. Me weke ciwanên Êzidî li ser xwe ferz dît, xebatên perwerdehiyê bimeşînin. Ji sala 2015’an ve xebatên me yên perwerdeya ziman destpêkiriye. Lê îsal me li Tilizêrê perwerdeya Kurdî daye destpêkirin. Em li dibistanê hem tîpên latînî ya Kurmancî fêrî wan dikin, hem jî Êzdayetî fêrî wan dikin. Yên bixwazin xwe fêrî Erebî bikin, em Erebî jî didin. Em di perwerdeyê de girîngiyê didin ol û perwerdeya zimanê Kurdî ya tîpên latînî. Dîsa em çand û dîrokê jî fêrî zarokan dikin.”

‘Gelek mirovên temen mezin jî dixwazin fêrî Kurdî bibin’

Mamoste Elî dazanîn ew diçin Sîba Şêx Xidir jî perwerdeya ziman didin û got: “Dema em diçin Sîba Şêx Xidir gelek kesên temen mezin û heta dayîk jî tên dixwazin xwe fêrî zimanê Kurdî bikin. Em jî li gorî derfetên xwe amadene di warê perwerdeyê de xizmetê ji gel re bikin.”

‘Em dixwazina ev şahî zêdetir çêbibin’

Şagirta bi navê Dilo jî kêfxweşiya xwe ji şahiyê anî ziman û wiha axivî: “Îro li medreseya Jiyanda şahî hate lidarxistin, rojekî gelekî xweş bû. Em kêfxweşin êdî herkes vedigere ser cih û warê xwe. Zûzû di dibistanan de şahî bo me nayên çêkirin, daxwaz dikin dem dem şahiyên bi vî awayî ji bo me werin çêkirin. Keyfa zarokan gelek ji van şahiyan re tên. Em daxwazê ji gelê xwe dikin vegerin ser cih û warê xwe. Her sal Tilizêr xweştir dibe. Par hejmar evqas nebû, lê îsal zêdetire. Tilizêr gelek xweş bûye.”

Bi boneya 4’ê Nîsanê Rojbûna Rêber Apo, li Navenda Şengalê û Geliyê Kersê jî şahî ji bo zarokên dibistanê hatin lidarxistin.