TAJÊ serdana YJŞ’ê kir; Jinên Êzidî ber bi azadiyê ve dimeşin
Şandeyeke ji TAJÊ bi mebesta pîrozkirina 8’ê Adarê li şervanên jin, serdana YJŞ’ê kir. Şandeya TAJÊ bi awayeke germ hate pêşwazîkirin û peyama; “Me vê rojê ji saya Rêber Apo naskir. Ne tenê rojek, hemû roj rojên me ne”, da.
Bi nêzbûna 8’ê Adarê Roja Jinên Kedkar a Cîhanê re, liv û tevgera jinan a li nava Şengalê zêde bûye. Li hemû gund, komelgeh û nahiyeyên Şengal rojev 8’ê Adarê ye. Îro şandeyek ji TAJÊ bi mebesta pîrozkirina 8’ê Adarê serdana şervanên YJŞ’ê kir. Şandeya TAJÊ deste gul dan şervanên jin û şervan jî bi dirûşmeya, ‘Jin Jiyan Azadî’ şande pêşwazî kirin. Şandeya TAJÊ 8’ê Adarê li hemû jinên di nava hêzên parastina Şengalê de cih digirin pîroz kir.
‘Em bi saya şervanên xwe tên parastin’
Bi navê şandeyê Endama Koordînasyona TAJÊ dayê Şemê Remo axivî. Dayê Şemê, diyar kir, ew bi saya şervanan tên parastin û wiha axivî: “Me pêwîst dît, di rojeke wisa de serdana şervanên xwe bikin ku em bi saya wan li vir tên parastin. Em vê rojê bi taybet li jinên ku li dijî dagirkeran li berxwe didin pîroz dikin. Îro li her derê ji bo azadiya xwe li berxwe dide û têdikoşe.”
‘Jinên Êzidî ber bi azadiyê ve dimeşin’
Şervana YJŞ’ê Cîlan Qîranî jî keyfxweşiya xwe ji serdana TAJÊ bi ajansa me re parve kir û wiha axivî: “Em weke jinên Êzidî û şervan, 8’ê Adarê li hemû jinan pîroz dikin. Li Şengalê jin bi keda xwe, heya astekî azadiyê bidest xistine û berbi azadiyê ve dimeşin. Îro dayikên me serdana me kirin. Ev ji bo me hêz û morale. Nirxên civaka me bi rêya keda jinê hatiye parastin. Ev ji bo me gelek watedare. Emê weke milîtanên gelê xwe, heya dawiyê van nirxan biparêzin.”
‘Emê xwedî li ramanên Rêber Apo derbikevin’
Cîlan Qîranî diyar kir, ji fermanê heya niha gelek guhertinên erênî di jina Êzidî de çêbûye û got: “Pêwîste em asta jinên Êzidî gihiştiyê bînin berçavê xwe. Îro jinên Êzidî xwedî fikir û hêza parastinê ye. Jinên Êzidî timî bi berxwedana xwe tênasîn. Civaka me jî civakeke berxwedêre û tu carî serî li ber fermanan ne tewandiye. Emê xwedî li ramanên Rêber Apo ya azadiya jinê esas digire derkevin.”
‘Em ji saya hêzên xwe yên parastinê li ser axa xwe dijîn’
Endama TAJÊ’ê Sêvê Xwedêda jî îşaret bi girîngiya hêzên parastina jinên Êzidî kir û got: “YJŞ hêza parastina jine. Hêzeke wiha ji bo me gelekî girînge. Ji saya YJŞ, YBŞ û Asayîşa Êzidxanê em dikarin li ser axa xwe azad bijîn. Lewma di rojên pîroz de em girîng dibînin, serdana hêzên xwe yên parastinê bikin.”
