Şêwirmendê serokwezîrê Iraqê bi PADÊ re civiya

Şêwirmendê serokwezîrê Iraqê Xelef Xidir yê ji bo karûbarên Êzidiyan, 3 rojin li Şengalê ye û bi gelek aliyên siyasî, kesayetên Şengalê re civiyaye. Xelef Xidir îro serdana navenda PADÊ a li Şengalê kir û ji aliyê hevserokê PADÊ Hisên Hecî ve hate pêşwazîkirin.

Xelef Xidir têkildarî serdana xwe ya ji bo Şengalê axivî û got; “Ji bo em ji rewşa Şengalê agadar bibin û daxwazên Şengaliyan ji wan bibihîsin, me serdana gelek cihan kir. Em dixwazin di nava xelkê Şengalê de bin û nêrînên wan bigihînin serokwezîrê Iraqê.”

Hevserokê PADÊ Hisên Hecî jî got; “Heya niha me wek xelê Şengalê tiştek ji aliyê Iraqê ve ji bo xwe neditiye, şêwirmendê serokwezîrê Iraqê hat û em bihevre civiyan, me di civînê de behsa mijarên îdareya Şengalê, vegera koçberan û kesên ji destê çeteyên DAIŞ’ê hatine rizgarkirin, kir.”

Hecî di dewamê de got; “Me ji wan re got ku Meclisa Xweseriya Şengalê ji dema fermanê heya niha rêveberiya vî xelkî dike û em weke xelkê Şengalê dixwazin xwe bi xwe rêvebibin. Em dixwazin di aliyê ewlekarî û rêvebirinê de jî xwe bi xwe rêvebibin. Herwiha ji bo parastina Şengalê hêzên me ên weke YBŞ û Asayîşê hene ku bi sedan şehîd dane. Lazime ev hêz fermî bibin ên parastina Şengalê, ji ber ku dema ev hêz hatin avakirin, ti hêzek din li Şengalê nebû.”

ŞENGAL/ROJNEWS