Partiyeke din tevlî Kordînasyona Hêz û Pêkhateyên Şengalê bû
Kordînasyona Hêz û Pêkhateyên Şengalê li dijî êrîş û tifaqên dijî Şengalê û ji bo ji nûve avakirina Şengalê ku îsal hatibû avakirin, her diçe mezin dibe û partiyeke din ya bi navê Hereke jî tevlî kordînasyonê bû.
Li dijî peyman û êrîşên li ser Şengalê û ji bo ji nûve avakirina Şengalê 25’ê Hezîrana 2023’yan bi beşdariya çend partî û pêkhateyên Şengalê Kordînasyona Hêz û Pêkhateyên Şengalê hatibû ragihandin. Mijarên stratejîk û girîng yên derbarê Şengalê de hevdîtinên li gel Iraqê bi navê kordînasyonê tên kirin û encamên erênî jî bixwere aniye.
Îro li navenda Şengalê li baregeha Yekîtî Nîştîmanî Kurdistanê, Tevgera Êzidiyan ya ji bo Çareserî û Pêşketinê (Hereke), tevlî Kordînasyona (Tensîq) Hêz û Pêkhateyên Şengalê bû. Bi amadebûna PADÊ, YNK’ê, Partiya Teqedûm, kesayetên olî, eşayîrî û pêkhateyên din yên Şengalê civînek hate lidarxistin û paşê jî hate ragihandin ku Hereke tevlî kordînasyonê bûye. Hereke bi îmzekirina peymanê tevlîbûna xwe ya li nava kordînasyonê fermî kir û eşkere kir ku ew ancax bikarin, bi yekîtiyê daxwazên civaka Êzidî û hemû pêkhateyên Şengalê li Iraqê biparêzin.
Armanca sereke ya Kordînasyonê vegera koçberên Şengalê, têkûzkirina ewlekarî û aramî li Şengalê, pêşxistina siyaset û dîplomasiyeke hevpar, pêşxistina îdareyeke di berjewendiya gelên Şengalê de û ji nûve avakirina Şengalê di warê binesazî û xizmetê de.
Mesihî, Sûne, Tirkmen, Şîe, PADÊ, Teqeddûm, YNK û herî dawî Hereke jî beşdarbû.
Hêjayî bibîrxistinêye di hilbijartinên parêzgehên Mûsilê de jî ev hêz li seranserê Neynowayê bi lîsteya bi navê, ‘Yekîtiya Gelên Neynowayê’ beşdarê hilbijartinê dibin.
ŞENGAL-ROJNEWS
