Li cihê bombebaranê daxuyanî: Yek kes jî bimîne em dest ji şerefa xwe bernadin

Rêveberiya Xweseriya Demokratîk a Şengalê, li pêşiya Nexweşxaneya Gundê Sikêniyê yê Şengalê ku balafirên dewleta Tirk a dagirker îro 3 caran bombebaran kir, daxuyaniyek da çapemeniyê.

Li ser navê rêveberiyê Alîkarê Hevserokên Meclîsa Rêveberiya Xweseriya Demokratîk a Şengalê (MXDŞ) Heso Îbrahîm axivî. Heso Îbrahîm bibîr xist ku êrîşên dewleta Tirk ên li ser Şengalê didomin, li aliyê din jî hatiye gotin ku dê Serokwezîrê Iraqê Mistefa Kazimî serdana Şengalê bike, lê diyar bûye ku serokwezîr nekariye serdana Çiyayê Şengalê bike.

‘Her cara yek ji Bexda were dewleta Tirk êrîş dike’

Heso Îbrahîm bal kişand ku her cara tê gotin wê rayedarek an jî şandeyek ji Bexdayê were Şengalê êrîşên dewleta Tirk li ser Şengalê çêdibin û wiha dom kir: “Ev ne carek û ne du carin, beriya ku ew ji Bexdayê werin vê derê, balafirên dewleta Tirk li ser Çiyayê Şengalê li şervanên YBŞ’ê didin. Duh jî fermandarê me, pêşengê me Seîd Hesen û birazê wî şehîd kirin. Îro jî êrîşî vir kirin.”

‘Emê bi doza xwe ve girêdayî bin’

Heso Îbrahîm destnîşan kir ku ew bi tu awayî dest ji têkoşîn û rûmeta xwe bernadin û  wiha dom kir: “Bila herkes zanibe, bila dewleta Iraqê zanibe, bila Kurdistan zanibe, bila dewletên navnetewî zanibin, tenê yek jî ji me bibîne, em Çiyayê Şengalê bernadin. Tenê yek jî ji me bibîne, emê li berxwe bidin, bila em şehîd bidin, birîndaran bidin, lê em dest ji şeref, namûs û kerameta xwe bernadin. Ew çend êrîş bikin jî, emê bi axa xwe ve, bi doza xwe ve bêne girêdan.”

Rexneya tund li Iraqê hat kirin

Heso Îbrahîm rexne li Hikûmeta Iraqê jî kir û got: “Ev şermezariyeke ji dewleta Iraqê re. Ji ber ku noqteyên wan 50 metreyan ji vê derê dûr in. Ew dewleta ku dibêje ez dewletim û artêşa wê 50 metre nêzî vir bin, lê êrîş çêbibe, ev bêşerefiyek mezin e.”

ROJNEWS-ŞENGAL