Kovan Îdo ya ji aliyê YPJ’ê ve hate rizgarkirin, gihişt Şengalê
Jina ciwan a Êzidî Kovan Îdo ku 2014’an ketibû destê çeteyên DAIŞ’ê, di encama operasyona QSD’ê ya kampa Holê de hate rizgarkirin, TAJÊ ew gihand malbata wê. Kovan ji bo pêşwaziya germ ya jinên Şengalê spasî kir û got: “Bi vî awayî pêşwazîkirin, ji bo min hesteke gelekî xweşe. Çawa bi dilekî xweş vegeriyam nava malbata xwe, hêvî dikim hemû dîlên din jî bi vî awayî vegerin malên xwe.”
Hêzên Ewlekariya Hindirîn ên Bakur û Rojhilatê Sûriyeyê, bi hevkariya QSD’ê û YPJ’ê meha Sibatê operasyoneke din a ‘Mirovî û Ewlehiyê’ li Kampa Holê ya li Hesekê da destpêkirin. Di wê operasyonê de jineke din ya Êzidî ya bi navê Kovan Îdo (26) ya 3’yê Tebaxa 2014’an ketibû destê çeteyên DAIŞ’ê û 16 salîbû li kampa Holê dijî, rizgar kiribûn. Kovan paşê radestê Mala Êzidiyan ya Rojavayê Kurdistanê hatibû kirin. Mala Êzidiyan jî Kovan Îdo bi rêya hêzên ewlekariyê gihand hêzên YBŞ û YJŞ’ê.
TAJÊ îro di arîfeya 8’ê Adarê de bi amadebûna malbatê û gelek jinan pêşwazî li Kovan Îdo kir. Paşê bi tilîlî û gulan radestê malbata wê hate kirin.
Endama TAJÊ’ê Edûl Elî kêfxweşiya xwe anîn ziman û spasiya hêzên ewlekariyê yên Rojavayê Kurdistanê kir û got: “Em xêrhatina Kovan dikin. Di arîfeya 8’ê Adarê de ne. Em vê rojê li hemû jinên Êzidî pîroz dikin û hêvî dikin hemû jinên dîl girtî werin rizgarkirin. QSD’ê û hêzên Rojava bi ked û xwîna xwe van dîlên me rizgar dikin. Îro em di pêşwaziya 8’ê Adarê dene, em 8’ê Adarê li tevahiya jinên Êzidî pîrozdikin em bi hêvîne hemû jinên Êzidî vegerin nav kes û karên xwe.”
‘Hestekî gelekî xweşe’
Kovan Îdo jî ji bo pêşwaziya bi coş a jinên Êzidî spasî kir û got : “Ez gelek kêfxweşim ku wisa hatim pêşwazîkirin û ev hesteke gelekî xweşe. Ez bihêvîme hemû jinên din jî bi kêfxweşî vegerin nava malbatên xwe û ji destê DAIŞ’ê rizgar bibin.”
Mamê Kovan Îdo, Xelef Şivan ku di pêşwaziyê de amadebû, ji ajansa me re axivî û got: “Dema çeteyên DAIŞ’ê êrîş kirin, Kovan li gel malbata xwe dîl ket. Wê ji Sinûnê birin Xanesorê û ji wir jî birin Reqayê. Piştî Reqa rizgar bû, derbasê Kampa Holê bû, lê ne diwêriya bêje Êzidî me. Ji ber malbatên DAIŞ’ê kesên dibêjin, em Êzidîne dikujin.”
Xelef Şivan spasiya hêzên Rojava, YBŞ û YJŞ’ê jî kir û wiha axivî: “Em Spasiya YBŞ’ê YJŞ’ê û hêzên Rojava dikin ku bi keda xwe girtiyên me digihînin me. Ji malbata Kovanê hîn dê û bavê wê diyar nînin, tu agahî jî wan nayê girtin. Em bang li aliyên eleqeder dikin, ji bo vegerandina windahiyên me bixebitin. Hîn jî hikûmeta Iraqê tiştek ji bo wan nekiriye, divê berpirsyariyên xwe bicîh bînin.”
