Li cihê bûyerê dayîkên Şengalê, bi amadebûna welatiyên li cihê bûyerê daxuyaniyekî dan çapemeniyê. Di daxuyaniyê de dayîka Zehra bi navê jinan axivî û peyamên girîng da raya giştî ya cîhanê, hikûmeta Iraqê û PDK’ê.
‘Li nexweşxaneyê zarok û nexweşên korona jî hebûn’
Dayîka Zehra ku timî xîtabê hemû mirovahiya xwedî wijdan kir, ev bang kir: ‘Em bang li cîhanê dikin, bang li mirovahiya xwedî wijdan dikin, çi ji deste we were bikin. Dengê me bigihînin her dere. Nîvê şeve ye, em hîn parçeyên zarokên xwe ji bin van xirbeyên nexweşxaneyê kom dikin. Nexweşxaneyeke medenîbû, xelkê me yê bi nexweşiya korona ketibûn têde dihatin dermankirin. Zarok jî di nexweşxaneyê de hebûn, hate bombekirin.’
‘Belaya vî Erdoganî û hevkarên wî ji me vekin’
Dayê Zehra bang li raya giştî ya cîhanê kir ku belaya Erdogan û hevalbendên wan ji Şengalê vekin û got: ‘Em hew serê xwe ji wan re ditewînin. Ji tank, top û teyareyên wan na ditirsinn.
Iraq û Mesûd Barzanî dest dane destê Erdogan. Ne xîret, ne şeref maye. Ka Iraq parastina me dike? Va bu dehê şeve em hîn li vir li parçeyên zarokên xwe digerin.’
‘Yan wê me biparêzin, yan dê Şengalê terk bikin’
Dayê Zehra diyar kir, yan wê hêzên Iraqê yên li Şengalê pêşî li van êrişên Tirkan bigirin, yan jî ewê artêşê ji Şengalê derxînin; ‘Eger wê parastina me bikin, bila bikin. Lê ger nakin, bila vir terk bikin. Eger bi jinan jî mabe, wê yek nuqteyeke wan li vir nemîne.’
Daxuyanî bi dirûşman bi dawî bû
Di dewama daxuyaniyê de dayê Zehra diyar kir, ew êdî qebûl nakin, di seytereyên Iraqê re derbas bibin û got; ‘Em hew qebûl dikin, di seytereyên wan re derbas bibin. Em hatin cenazeyên xwe bigirin, nasname pirsîn. Min jî ji wan re got, nasnameya me fermandarên me bûn, we wan bir. Divê dijmin baş bizane, em êdî vê artêşa Iraqê ser serê xwe qebûl nakin.’ Jinên Şengalê û welatî daxuyaniyê bi dirûşmên, ‘Bimre xiyanet’, ‘Şehîd namirin’ û ‘Bijî Serok Apo’, ‘Bê Serok Jiyan Nabe’ û bi tilîliyan bi dawî kirin.
Duh jî li sûka kevin a Şengalê êrîşa hewayî çêbûbû û di encamê de fermadarê Şengalê Seîd Hesen û biraziyê wî û şervanekî YBŞ’ê şehîd bûbûn. Her wiha çend kesên di heman seyareyê de jî birîndarbûbûn.
ROJENWS-ŞENGAL
