70’ê malbatên din vegeriyan Şengalê

Ji 11 Hezar malbatên ku navê xwe qeyd kirine û hemû belgeyên xwe temam kirine, doh jî 70 malbatên Şengalî re rê hate dayîn ku vegerin ser cih û warên xwe. Bi sedan malbat jî amadekariyên xwe dikin ku di rojên pêş de vegerin.

Malbatên ku doh vegeriyanŞengalê, ji tevahiya Kampên Başûr tên. Piranî jî ji kampa Mam Reşan û Êsiya yên girêdayî Duhokê hatin.

Wezareta Koç û Koçberan biryar daye ku heya 30’ê Tîrmehê deriyê tevahî kampên li Başûrê Kurdistanê bên girtin û hemû koçber vegerin ser cih û warên xwe.

Wezareta Perwerdê ya Iraqê jî ragihandibû ku wê ji îsal û şûnde êdî dibistan li kampan neyên vekirin û wê hemû saziyên xwe yên girêdayî perwerdeyê ji kampan vekişîne.

Li gorî agahiyên ku ji kampan hatine wergirtin, bi sedan malbatên din xwe amade dikin ku di rojên pêşiya me de vegerin Şengalê.